O mirallo d'o tiempo

O mirallo d'o tiempo,
que reflexa ista parola
e iste silencio.

En un inte,
a mía luenga,
o mío cuerpo,
o mundo,
tot muerto.

O mirallo d'o tiempo -
no i hai piedat
si os huellos son ciegos.


P.D. Poema escrito en una polida grafía.

Os dreitos umanos

Os dreitos umanos
no son ta toz
sino ta qui puede
permitir-se-los.
Allora, conto
que han a quedar-ie
mui pocos
sers umanos,
si os contamos
con os didos d'una man
u con a rebista Forbes
en l'atra.

Camín de Letonia

Si tot ba bien, aspero que en bellas semanas iste cucut ya no tos escriba dende a ziudat d'o zierzo sino dende a lexana Riga, en Letonia, an bolará perque l'han ofrexiu treballar-ie ta l'Academia de Cultura Letona como leutor d'español.

Diz que Riga ye o París d'o Baltico. Me ferá muitismo goyo rezentar-tos as suyas polidezas y as mías cutianas abenturas en a nuestra quiesta luenga aragonesa.

Xintoísmo y lei de luengas

O xintoísmo ye l'antiga relichión de Chapón d'antis que i plegase o budismo.
Ta o xinto l'uniberso ye rebutién de dioses. Kami les claman.
Y Diz que son güeito millons, Yaoyorozu-no-kami,
que ye como dizir-ne sinfinitos.
En iste uniberso poblau de fuerzas naturals y espritos
a bida ye, de raso, amoral y indiferén:
no siempre a birtut reculle recompiensa y no siempre o mal se castiga.

Ayer, mientras esnabesa Independenzia, con as mans en as pochas y a capeza cacha,
empentau per o furo y quiesto zierzo chunto a milenta millons de melampos,
tantos ñ'hai que os kami ñ'abrían jopau corriendo,
caduqué que yo tamién quiero estar xintoísta, amos, que quiero estar realista,
y bibir-ie entre dioses de piedra antis que entre ombres de bardo,
sin asperanzas ni deleras, firme combenziu que ista tierra no tien remeyo.

Asinas será a nueba Lei de luengas, una lei que como lo budismo en Chapón,
traye a creyenzia escatolochica en una bida millor.
Pero o camín d'o xinto me guía. No me dixaré estorrozar per falsas creyenzias.
Güei tiengo una nueba fe.

copy (left) poetry

En a poesía no i hai marguin ta o mercau,
perque o mercau ye incapable d'abalorar a poesía,
encara que a poesía sia capable d'abalorar o mercau.

Ixo fa d'a poesía l'asesinato perfeuto:
un d'os zaguers autos de rebeldía que nos quedan.

Os textos que amanixen en ista blog son publicaus dende agora baxo lizenzia de Creative Commons.

Os foraus d'a memoria

Toz semos berdugos
t'os güellos d'as bitimas.

Exposizión en o United States Holocaust Memorial Museum de fotografías quitadas a os miembros d'as SS y o presonal auxiliar a cargo d'o complexo d'Auschwitz-Birkenau, l'estiu de l'año 1944.

L'album an se troboron amuestra o retrato d'a bida cutiana en os zaguers meses d'a guerra, cuan atros campos de conzentrazión y treballo ya yeran estaus liberaus en l'este por as tropas sobieticas, as cambras de gas funzionaban a tot estrús y os ofizials d'as SS que serbiban en Auschwitz desfrutaban -dica la ebacuazión d'o campo en chinero de 1945- d'autos sozials y zeremonias formals.

Iste album estió perdiu o zaguer meyo sieglo.



As imáchens que contiene no forman parti d'a textura d'o tiempo; son foraus en a memoria.

Haiku guito

Tan falso ye o sentiu d’as mugas
como buedo’l d’a bida d’os muertos
que as esfendioron.